熨衫,其實好簡單 (2)

Impressed生活小貼士Leave a Comment

大家有無試到上一篇幫大家熨衫變得更容易嘅方法呢?但係永遠都仲係有D衣物嘅類別係比較難熨同達到理想效果。有邊個唔鐘意一件完美骨直嘅恤衫或者裙!有見及此,我就分析同根據平時我地日常生活最易遇到必熨而又好難熨得好嘅衣物:恤衫,西褲同百褶裙為大家提供針對佢地嘅不同熨法。某類型布料可能需要特別嘅悉心處理,但一般來講大部份布料嘅處理方法都係大致相同。

 

恤衫
熨恤衫時,最好由衫袖開始。因為熨完之後,你就可以由衫袖係熨衫板嘅兩邊垂放。如果你先熨左其他部份,最後先熨衫袖的話,會令到恤衫其他已熨嘅地方起皺。記得熨衫袖前,將袖上面嘅鈕扣先打開,呢個係初熨衫者常犯嘅普通錯誤。打開鈕扣可以幫助你更加容易將成隻袖由上而下順暢地熨直。

bizshirts_lg

西褲
大家衣櫃點都會有條番工必備又百搭嘅西褲。如果想達到熨完直一直嘅效果, 首先將前面嘅口袋向外反,之後就可以將熨斗係褲上面開始壓熨(先壓,然後輕力向同一個方向來回熨)。完成後就可以將熨斗先拎起,將抽出嘅口袋放回之後繼續係褲上面來回咁熨。時常記得係同壓熨嘅方式,而唔係將布料一直向前推而達到筆直嘅效果。

Pile of suit pants on wooden table
百褶裙
無論係羊毛或者係相對比較軟身布料,一個正確嘅熨法絕對係將百褶裙保持到同當初買番屋企一樣嘅重要步驟! 由裙嘅頂部開始,輕力順住每一個褶嘅開端先壓一下,再往下熨。每壓完後按一下蒸氣,再向下熨。 記得唔好用拉嘅方法,將熨斗用力由開端大力咁拉到底端,原因係拉嘅動作會將布料中嘅纖維撐大或者會無意地熨出不必要嘅皺紋。 

img_3709

非布料,可免則免
當一啲係衣物上非布料嘅裝飾物例如鈕扣(熨斗嘅熱度同力度會變得易爛),絲印(可能會溶或者係衫上面化開),珠片(易溶)都唔知道熨衫時應該點樣處理. 其實只要用熨斗前方嘅尖端係有鈕扣或者其他裝飾物嘅範圍輕輕幾按就可以解決到。如果你嘅T恤大部份範圍都有印上去嘅圖案或者珠片等飾物,你可以將整件衫反轉,又或者係衫上面舖一塊薄薄嘅毛巾然後先開始熨。 

10-buttons-12-days-of-christmas

熨完衫後,記得立即將佢地掛好!咁就可以係你下次著之前,都可以令到衣物保持順直。係坐底之前可以先用手輕輕將裙拉直先坐,或者係坐低後先將恤衫拉直先往後靠前, 咁樣就算著左成日都唔怕咁易起皺啦! Happy Ironing!